Janubiy Sudan prezidenti Salva Kiirga xizmat qiluvchi harbiylarning kamida 5 nafari mamlakat poytaxti Jubada isyonchilar bilan bo‘lib o‘tgan to‘qnashuvlar oqibatida halok bo‘ldi. Bu haqda AFP agentligiga tayanib, “TASS” xabar bermoqda.
“Bizdagi ma’lumotlarga ko‘ra, besh nafar harbiy halok bo‘ldi, yana ikki nafari jarohatlandi”, – deb ma’lum qildi mamlakat vitse-prezidenti matbuot kotibi. Keyinroq Janubiy Sudan mudofaa vaziri Kiol Manyang ham ushbu ma’lumotni tasdiqladi.
2013-yil dekabrida Salva Kiir qo‘zg‘alonchilarning sobiq yetakchisi, o‘zining o‘rinbosari Riyek Masharning lavozimidan bo‘shatishi Janubiy Sudanda mojaroning kelib chiqishiga sabab bo‘ldi. Ikki siyosatchi o‘rtasidagi qarama-qarshilik tufayli ularning tarafdorlari, ikki xil millat vakillari o‘rtasida to‘qnashuvlar sodir bo‘lishi tezlik bilan avj oldi. Buning natijasida 10 mingga yaqin kishi halok bo‘ldi, 2,2 million aholi qochoqqa aylandi.
2015-yilning avgust oyida Kiir va Mashar tinchlik kelishuvini imzoladi. Shu yilning yanvar oyidan boshlab ular milliy birlik o‘tish hukumati tuzishga kelishib oldi. 26-aprel kuni Mashar vitse-prezident lavozimiga qayta o‘tish uchun mamlakat poytaxti Juba shahrida qasamyod keltirdi.
28-aprel kuni prezident hukumatning yangi tarkibini e’lon qildi. Unga ko‘ra, Kiirning partiyasi Mudofaa va Moliya vazirliklarini, Mashar tarafdorlari esa Ichki ishlar vazirligi va neft ishlarini boshqaradi. Qolgan muxolifatchilar Tashqi ishlar vazirligi va Qishloq xo‘jaligi vazirliklarini boshqaradi. Yangi mahkama 24-iyun kuni qasamyod qilgandi.
Izoh (0)