Қирғизистон иқтисодиёт вазири Арзибек Кожошев Норин вилоятига ишчи ташрифи давомида 8 долларга шим сотиб олди. Бу ҳақда K-News хабар бермоқда.
Вазир вилоятдаги бизнес вакиллари билан учрашиб, кичик корхоналарни бориб кўрди. Улардан бири 100 нафар аёл ишлайдиган ва кунига 500 дона эркаклар шими тайёрланадиган «Шалбар» мини-цехи бўлди. Бу ерда ишлаб чиқариладиган маҳсулотлар Россияга, жумладан, Татаристон, Москва вилояти ва Волгабўйига экспорт қилинади.
Кожошев тайёр шим таннархи билан қизиқди ва бунга унинг қиймати 7 долларга тенг эканлиги ҳақида жавоб олди. Шундан сўнг вазир «Унда қирғиз удумига мувофиқ бироз фойдасини — 8 доллар қолдираман. Токи маҳсулотингиз доимо харидоргир бўлсин», — дея битта шим харид қилди ва корхона ишига муваффақият тилади.
Изоҳ (0)