Тошкент шаҳар чорраҳаларига ўрнатилган кузатув камералари ёзиб олган йўл-транспорт ҳодисаларининг навбатдаги жамланмаси Moveр видеохизматига жойлаштирилди. Бу ҳақда Facebook’даги «Водители Ташкента» гуруҳида хабар қолдирилган.
Видеожамланмада пиёдалар иштирокидаги жами учта — 2016 йилнинг 29 февраль, 19 март кунлари содир бўлган иккита ва санаси кўрсатилмаган битта авария кўрсатилган. Дастлабки икки ҳодисада Spark автомобильлари пиёдаларни уриб юборган бўлса, сўнгги ҳодисада Malibu автомобильи пиёдани уриб, воқеа жойидан қочишга уринганини кўриш мумкин.
Видеода кўрсатилган йўл-транспорт ҳодисалари пиёдалар ва автомобильларнинг светофор ишораларига риоя этмаслиги, шунингдек, пиёдаларнинг белгиланмаган жойлардан йўлни кесиб ўтиши оқибатида рўй берганини кўриш мумкин.
Аввалроқ Тошкент чорраҳаларига ўрнатилган камералар ёзиб олган авариялар видеожамланмаси эълон қилинган эди. Унда 2016 йилнинг 20 январидан 23 мартигача бўлган даврда юз берган бир қатор йўл-транспорт ҳодисалари видеоси ўрин олган эди.
2016 йилнинг январида Тошкентдаги 100 дан ортиқ катта чорраҳалар видеофиксация воситалари билан таъминлангани ҳамда улар синов тартибида ишга тушгани маълум қилинган эди. Ўзбекистон Ички ишлар вазирлиги Йўл ҳаракати хавфсизлиги бош бошқармаси матбуот хизмати раҳбари муовини Мансур Риҳсиевнинг «Дарё»га маълум қилишича, «фото- ва видеофиксация воситалари орқали аниқланган қоидабузарликларга нисбатан жарималар қўллаш амалиёти тўлиқ тартибда ишга тушишидан 10 кун аввал бу ҳақда ОАВ орқали жамоатчиликка ахборот берилади».
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)