Toshkent shahar chorrahalariga o‘rnatilgan kuzatuv kameralari yozib olgan yo‘l-transport hodisalarining navbatdagi jamlanmasi Mover videoxizmatiga joylashtirildi. Bu haqda Facebook’dagi “Voditeli Tashkenta” guruhida xabar qoldirilgan.
Videojamlanmada piyodalar ishtirokidagi jami uchta — 2016-yilning 29-fevral, 19-mart kunlari sodir bo‘lgan ikkita va sanasi ko‘rsatilmagan bitta avariya ko‘rsatilgan. Dastlabki ikki hodisada Spark avtomobillari piyodalarni urib yuborgan bo‘lsa, so‘nggi hodisada Malibu avtomobili piyodani urib, voqea joyidan qochishga uringanini ko‘rish mumkin.
Videoda ko‘rsatilgan yo‘l-transport hodisalari piyodalar va avtomobillarning svetofor ishoralariga rioya etmasligi, shuningdek, piyodalarning belgilanmagan joylardan yo‘lni kesib o‘tishi oqibatida ro‘y berganini ko‘rish mumkin.
Avvalroq Toshkent chorrahalariga o‘rnatilgan kameralar yozib olgan avariyalar videojamlanmasi e’lon qilingan edi. Unda 2016-yilning 20-yanvaridan 23-martigacha bo‘lgan davrda yuz bergan bir qator yo‘l-transport hodisalari videosi o‘rin olgan edi.
2016-yilning yanvarida Toshkentdagi 100 dan ortiq katta chorrahalar videofiksatsiya vositalari bilan ta’minlangani hamda ular sinov tartibida ishga tushgani ma’lum qilingan edi. O‘zbekiston Ichki ishlar vazirligi Yo‘l harakati xavfsizligi bosh boshqarmasi matbuot xizmati rahbari muovini Mansur Rihsiyevning “Daryo”ga ma’lum qilishicha, “foto- va videofiksatsiya vositalari orqali aniqlangan qoidabuzarliklarga nisbatan jarimalar qo‘llash amaliyoti to‘liq tartibda ishga tushishidan 10 kun avval bu haqda OAV orqali jamoatchilikka axborot beriladi”.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)