Toshkent shahri chorrahalarida qoidabuzarliklarni avtomatik aniqlashga mo‘ljallangan kameralarning o‘rnatilishi yo‘llarda Yo‘l harakati xafsizligi bosh boshqarmasi (YHXBB) nazoratchilari soni kamayishiga sabab bo‘lmaydi. Bu haqda O‘zbekiston IIV YHXBB vakili Alisher Sattorov Uzbekistan Today’ga ma’lum qildi.

Toshkent shahar Yo‘l harakati xavfsizligi bosh boshqarmasining shahar ko‘chalarida xizmat qiluvchi xodimlari soni bilan bog‘liq shtat tuzilmasiga ba’zi o‘zgartirishlar kiritilgan bo‘lib, bu faqatgina ko‘chalardagi patrullarning biroz qisqarishiga daxl qiladi.

Hozirgi vaqtda Toshkent shahrining 100 dan ortiq katta chorrahalari videofiksatsiya vositalari bilan ta’minlangan. Ushbu yangi texnologiyalar yo‘l harakati jarayonida yuz beradigan qoidabuzarliklarni avtomatik ravishda aniqlash va bu haqda ogohlantirish maqsadida tatbiq etilmoqda.

“Biz zamonaviy, intellektual tizim ishlab chiqyapmiz, uni boshqarish uchun yuqori malakali mutaxassislar zarur. Shu sababli ham shaxsiy tarkibning bir qismini qisqartirish bilan, mazkur tizim boshqaruvini ta’minlaydigan yosh xodimlarni jalb etamiz. Umuman olganda, shtatni qisqartirish nazarda tutilayotgani yo‘q”, — dedi Sattorov.

Uning so‘zlariga ko‘ra, hozirgi kunda Toshkent shahrida 400 dan ortiq tartibga solinadigan chorrahalar bor. “Xodimlarimizda boshqa joylardagi yo‘l harakati xavfsizligini ta’minlash uchun ish yetarli. Nazoratchilar soni avvalgidek qoladi, ularning ishi esa bir necha bor ortadi”, — deya ta’kidladi Sattorov.

Avvalroq Toshkent shahridagi yo‘llar va chorrahalarga o‘rnatilgan videofiksatsiya vositalari sinov tartibida ishga tushgani haqida xabar berilgan edi.