Хонанда Алижон Исоқовга тегишли Toyota Land Cruiser Prado автомобилининг бордюрга урилиб, ағдарилиб кетиши оқибатида тан жароҳати олган хонанда Аҳрор Усмоновнинг аҳволи оғир. Бу ҳақда таниқли сўз устаси Обид Асомов Instagram’даги саҳифасида хабар қолдирган.
«Инсон эртага нима бўлишини билмайди. Ажойиб овоз соҳиби, яхши укам Аҳрор Усмонов автоҳалокат сабаб, бир ҳафтадирки, жуда оғир аҳволда ётибди», — деб ёзади Обид Асомов.
«Мухлисларимиздан илтимос, шундай азиз кунларда шу йигитнинг ҳаққига дуо қилинглар. Болаларининг, ўзбек санъатининг бахтига соғайиб кецин», — деб, Обид Асомов Instagram’даги ўз ўқувчиларига илтимос билан мурожаат қилган.
Аввалроқ хонанда Алижон Исоқовнинг Toyota Land Cruiser Prado автомобили Чорвоқ йўлида аварияга учрагани ҳақида хабар берилган эди.
Автомобиль ичида Алижон Исоқовдан ташқари Аҳрор Усмонов, унинг турмуш ўртоғи ва уч қизи ҳамда бир шогирди, жами етти киши бўлган, ҳодиса вақтида автомобилни Аҳрор Усмоновнинг турмуш ўртоғи бошқараётган бўлган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)