Қозоғистон илк бор БМТ Хавфсизлик кенгашининг 2017—2018 йиллардаги доимий бўлмаган аъзоси мақомини олди. Бош ассамблеяда бўлиб ўтган овоз бериш чоғида мамлакат 138 давлат овозини олди ва 55 овоз тўплаган Таиланддан ўзиб кетди. Бу ҳақда «ТАСС» хабар бермоқда.
«Овозларнинг талаб этилган учдан икки қисмини олиб, Қозоғистон икки йиллик муддатга Хавфсизлик кенгаши аъзоси этиб сайланди. Муддат 2017 йил январидан бошланади», — дея маълум қилган Бош ассамблея 70-сессияси раиси Могенс Люккетофт.
Қозоғистон кенгашда Малайзияни алмаштиради. Шу тариқа 2017 йил 1 январдан кенгаш таркибида собиқ Иттифоқнинг уч давлати бўлади: Россия (доимий аъзо) Украина ва Қозоғистон (доимий бўлмаган аъзолар).
Қозоғистон Хавфсизлик кенгаши таркибига ҳеч қачон кирмаган БМТга аъзо 68 давлат қаторида эди. Улар орасида Афғонистан, Албания, Грузия, Исроил, Кипр, Қирғизистон, КХДР, Молдова, Сербия, Тожикистон, Туркманистон, Ўзбекистон, Швейцария ва Эстония бор.
Изоҳ (0)