Латвия адлия вазири Дзинтарс Расначс вазирлик транспортидан шахсий жавонини ташишда фойдаланиш орқали касбий ахлоқ қоидаларини бузганлигини тан олди ва ўз хатти-ҳаракатлари билан кимгадир зарар етказган бўлса, барчасидан узр сўради, деб ёзади «Интерфакс».
«Менинг хатти-ҳаракатларим нопрофессионал бўлди, бунинг учун яна бир марта омма олдида узр сўрайман. Бу шошилинч тартибдаги алоҳида вазият эди, буни ишга тезроқ қайтиш мумкин бўлиши учун қилдим», — деди у.
Аввалроқ Расначснинг хатти-ҳаракатларини Латвия бош вазири Марис Кучинскис номақбул деб атаган, у шахсий эҳтиёжлари учун хизмат транспортидан фойдаланиб, давлат бошқарувининг бошқа ишчиларига ёмон намуна кўрсатганини айтган эди.
Нашр эслатишича, 30 март куни Расначс янги хонадонга кўчаётиб, адлия вазирлиги микроавтобусида ўз жавонини ташиган эди. Бензин учун у ҳайдовчига 20 евро берган.
Изоҳ (0)