Ўзбекистон Республикаси Олий хўжалик суди пленумининг навбатдаги мажлиси бўлиб ўтди. Унда сенаторлар, депутатлар, ҳуқуқни муҳофаза қилувчи ва назорат қилувчи органларнинг масъул ходимлари, ҳуқуқшунос олимлар, судьялар ва видеоконференцалоқа тизими орқали жойлардаги хўжалик судлари вакиллари иштирок этди. Бу ҳақда ЎзА хабар бермоқда.
Мажлисда Олий хўжалик суди пленумининг «Давлат органлари ва фуқароларнинг ўзини ўзи бошқариш органларининг қонун ҳужжатларига мувофиқ бўлмаган, ташкилотлар ва фуқароларнинг ҳуқуқлари ва қонун билан қўриқланадиган манфаатларини бузадиган ҳужжатларини (бутунлай ёки қисман) ҳақиқий эмас деб топиш, мансабдор шахсларнинг шундай ҳаракатларини (ҳаракатсизлигини) қонунга хилоф деб топиш тўғрисидаги низоларни ҳал этишда қонун ҳужжатларини қўллашнинг айрим масалалари ҳақида»ги қарори лойиҳаси муҳокама этилди.
Судларга юридик шахслар, кичик бизнес ва хусусий тадбиркорлик субъектларининг фаолиятига ноқонуний аралашган, тадбиркорлик фаолиятига тўсқинлик қилган ҳар бир ҳолат бўйича давлат органлари мансабдор шахсларининг қонунда белгиланган жавобгарлиги масалаларини ҳал этишлари тушунтирилди. Қонунбузилиши ҳолатларини келтириб чиқарган сабаблар ва шароитларни ўрганиб, хусусий ажримлар чиқариш орқали тадбиркорликни ривожлантириш йўлидаги тўсиқларни бартараф этиш чораларини кўриш лозимлигига эътибор қаратилди.
Мажлисда кўриб чиқилган масала тадбиркорлик субъектларининг ҳуқуқлари ва қонуний манфаатларини суд орқали ишончли ҳимоя қилишда муҳим аҳамият касб этиши таъкидланди. Қарор хўжалик судлари томонидан ушбу тоифадаги ишларни кўришда қонунчилик ҳужжатлари тўғри ва бир хилда қўлланилишини таъминлашга хизмат қилади.
Йиғилишда Ўзбекистон Республикаси Олий хўжалик суди пленумининг айрим қарорларига ўзгартиш ва қўшимчалар киритиш тўғрисидаги масала ҳам кўриб чиқилди. Муҳокама қилинган масалалар юзасидан тегишли қарорлар қабул қилинди.
Изоҳ (0)