Бангладеш аҳолисини жазирамадан қутқариш учун Intel компаниясининг мамлакатдаги филиали уйларга кондиционерлар — доим қўл остида бўладиган материаллардан тайёрланиб, электр токи талаб қилмайдиган «экосовутгичлар»ни ўрнатди, деб ёзади Naked Science.
Ғаройиб ихтиро видеоси май ойидаёқ тарқалган эди, аммо унинг тафсилотлари эндигина маълум бўлди. «Экокулер»ни яратиш ғояси Америка корпорациясига бевосита алоқадор бўлган Grameen Intel компанияси ишлаб чиқувчиларига тегишли.
Бангладешнинг Ражбари округида кўп кишилар электр токисиз яшайди. Қишлоқ жойларда уйлар рух билан қопланган тунукадан қилинган, ҳаво ҳарорати эса ёзда бу ерда Цельсий бўйича 45 даражагача етади. Одамлар жазирама вақтида фақат уйдан ташқарида жон сақлаши мумкин.
Муаммони ҳал этиш учун ишлаб чиқувчилар айлана тешиклардан иборат махсус тахта ясади. У уйнинг деворига деразага қўйиладиган чивин тўри сифатида илинади. Тешикларга икки бўлакка бўлинган пластик бутилкалар жойланади. Иссиқ ҳаво бутилкалар орқали ўтиб, уйга салқин ҳолда киради. Ҳароратдаги фарқ унчалик катта эмас (тахминан 5 даража), аммо бу одамларга уй ичида ўтириш имконини беради.
Grameen Intel креатив супервайзери Ашиз Пол сўзларига кўра, қизининг физика бўйича репетитори билан суҳбатини тасодифан эшитиб қолиши натижасида унда бундай ғоя пайдо бўлган. Ҳозирда «экокулер»лар Бангладешдаги 25 мингта уйга ўрнатилган. Ишлаб чиқувчилар ўз ихтироси учун патент олмоқчи эмаслигини айтди — ғоядан истаган киши фойдаланиши мумкин.
Изоҳ (0)