Тошкентда Huawei P9 смартфони 3 млн сўмдан сотувга чиқди

Ўзбекистонда Хитой компаниясининг Huawei P9 смартфони сотила бошлади, деб ёзади «Mobinfo.uz».

Пойтахт бозорида у турли ҳажмдаги ички ва тезкор хотирага эга икки хил версияда таклиф қилинмоқда. Ҳар иккала қурилма ҳам тўлиқ металл корпус ва орқа панелдаги бармоқ изи сканери билан жиҳозланган.

Huawei P9 5,2 дюймли ва 1080×1920 пикселли Full HD-экран, саккиз ядроли Huawei Kirin 955 чипсети, 3000 мА/соат сиғимли аккумулятор, 12 мегапикселли асосий ва 8 мегапикселли олд камерага эга. Standard версиясида 3 Гб тезкор ва 32 Гб ички хотира бўлади, Premium версиясида эса булар тегишли равишда 4 ва 64 гигабайтга тенг бўлади. Смартфонлар EMUI 4.1 қобиқли Android 6.0 Marshmallow операцион тизимида ишлайди.

Тошкентнинг «Флешка» савдо мажмуасида 32 Гб ички хотирага эга Huawei P9 смартфони тахминан 3 миллион сўмдан, 64 гигабайтлиси эса 3,6 миллион сўмдан сотилмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.