Коррупция ва ҳокимиятни зўрлик билан эгаллашга тайёргарликда гумонланиб қўлга олинган Қирғизистон собиқ давлат котиби Достон Саригулов суд қарори билан икки ой муддатга қамоққа тортилди. Бу ҳақда мамлакат миллий хавфсизлик давлат қўмитаси матбуот хизмати маълум қилди, дея хабар беради «Интерфакс».
Қирғизистон махсус хизмати «Кумтор» олтин кони бўйича келишувлар тузишдаги коррупция аломатлари юзасидан янги далиллар аниқлангани сабабли уй қамоғида бўлган Саригулов 13 июнь, душанба куни тергов изоляторига жойлаштирилди.
Матбуот хизматига кўра, «Кумтор» лойиҳаси бўйича жиноий иш доирасида «Камеко», «Кумтор Оперейтинг», «Кумтор голд», «Центерра Голд» компаниялари собиқ президенти Леонард Хоменюкнинг 1992—1999 йилларда қирғиз томонидан мазкур лойиҳага бош-қош бўлган «Киргизалтин» ОАЖ собиқ президенти Саригулов ҳаракатларидаги коррупция аломатлари бўйича кўрсатмалари кўриб чиқилмоқда. Тергов «Кумтор» лойиҳасидаги коррупция ҳолатларини ўрганиш чоғида бундай схемалар ташкилотчилари — Қирғизистоннинг собиқ президентлари Асқар Акаев ва Қурманбек Бакиев оила аъзолари ҳамда яқинлари томонидан қаршилик, таҳдидларга дуч келган.
Изоҳ (0)