Малайзиянинг 2014 йил мартида ғойиб бўлган Boeing’ини Ҳинд океанида қидириш ишлари август ойида якунланиши мумкин. Бу ҳақда Австралиянинг Транспортдаги хавфсизлик бюроси (АТХБ) вакиллари маълум қилди, деб ёзади «ТАСС».
Уларнинг таъкидлашича, қидирув ишлари бораётган ҳудудда сақланиб турган бўронли ҳаво ишга жуда катта таъсир ўткамзоқда.
«Айни пайтгача умумий майдони 120 минг квадрат км ҳудуднинг 105 минг квадрат км майдони текшириб чиқилди. Дастлаб ишларни йил ўртасида якунлаш режалаштирилган эди, аммо об-ҳаво шароитларини ҳисобга олган ҳолда, қидирувлар августгача чўзилиши кутилмоқда. Яқин ойлар ичида ҳаво янада ёмонлашиши мумкин», — деди АТХБ ходими.
Унинг айтишича, Австралия, Малайзия ва Хитой авиалайнернинг жойлашган ўрнига аниқлик киритадиган янги маълумотлар топилмаса, ҳозирги қидирув ҳудудининг майдони кенгайтирилмаслиги ҳақида келишиб олган.
Эслатиб ўтамиз, Куала-Лумпурдан Пекинга йўл олган ва бортида 227 нафар йўловчи, 12 нафар экипаж аъзоси бўлган лайнер 2014 йил, 8 мартга ўтар кечаси ғойиб бўлган. Ҳаво кемаси Ҳинд океанининг жанубий қисмига қулагани тахмин қилинади, бироқ ҳозиргача бунинг далиллари топилмаган.
Изоҳ (0)