Исроил парламенти спикери Юлий Эдельштейн ЮКОС компанияси собиқ эгаларидан бири Леонид Невзлиннинг қизи Иринага уйланди. Бу уларнинг иккинчи никоҳи, Эдельштейннинг 30 йил бирга яшаган хотини икки йил аввал саратон туфайли вафот этган, дея хабар беради «РИА Новости».
Маҳаллий телевидениенинг 10-каналига кўра, никоҳ маросими 14 июнь, сешанба куни Қуддус марказида, қариндош ва яқин дўстлар, жами 180 нафар меҳмон иштирокида бўлиб ўтди. Ой охирида катта кўламдаги тўй маросими ўтказилиши ва унга мингга яқин киши, жумладан, Исроил парламенти тўлиқ таркиби таклиф этилиши кўзда тутилган.
1987 йилда Совет Иттифоқидан кўчиб борган ва русийзабонларнинг «Исраэль ба-Алия» партиясига асос солган, кетма-кет етти бор депутат этиб сайланган, алоқа вазири бўлган Эдельштейн икки муддатдан бери маҳаллий парламент — Кнессетни бошқариб келмоқда. Ирина Невзлина Россияни 2003 йилда тарк этган, ҳозир Исроилда НАДАВ хайрия жамғармаси ва Яҳудийлар музейи директорлар кенгашини бошқаради. Унинг отаси Леонид Невзлин Россияда қотиллик ва қотилликка қасд қилишда айбланиб, сиртдан ҳукм қилинган. Унинг ўзи айбини тан олмади, Исроил эса экстрадиция қилишдан бош тортди.
Изоҳ (0)