Япониянинг Хоккайдо шимолий префектурасидаги Тома шаҳри фермерлари машҳур «дэнскэ» навидаги қора тарвузни 500 минг иена (қарийб 4,7 минг доллар)га сотди, деб хабар бермоқда «ТАСС». Бу йилги биринчи кимошди савдосида шунга ўхшаш 260 та тарвуз сотилди.
Харидорнинг тарвуз учун катта маблағ сарфлаганига қарамай, унинг нархи рекорд сифатида қайд этилмади. Энг қиммат «дэнскэ» 2008 йилда 650 минг иена (қарийб 6,1 минг доллар)га сотилган эди. Ушбу турдаги тарвузлар ўзининг тўқ яшил, деярли қора пўсти, ўзгача серсувлиги ва ширинлиги билан машҳур ҳисобланади. Тома шаҳри уларнинг етиштириладиган маркази саналади ва шу ернинг ўзида ҳар йили кимошди савдоси ўтказилади. Жорий йилда Хоккайдо фермерлари камида 70 мингта сара тарвузни ўртача 5 минг иена (47 доллар)дан сотишни режалаштирган.
Японияда ҳажми, шакли, таъми ва ранги ўзгача бўлган меваларни кўпинча ушбу туркумдаги товарларга хос бўлмаган ўта қиммат нархда сотувга қўйилади. Шу йилнинг май ойида «юбари» навидаги бир жуфт қовун рекорд нархда – 3 миллион иена (28 минг доллардан зиёд)га сотилди. Ўтган йили эса харидорлар Миядзаки префектурасида етиштирилган бир жуфт манго учун 2,5 минг ҳамда 30 дона мағиздан иборат бир боғ узум учун 8,2 минг долларни аямади.
Изоҳ (0)