Россиялик ва англиялик футбол ишқибозлари иштирокидаги тартибсизликлар яна такрорланса, бу икки давлат терма жамоалари Европа чемпионатидан четлаштирилиши мумкин. Бу борада УЕФА расмий сайтида огоҳлантириш чоп этилди, деб хабар беради «Sovsport.ru».
«УЕФА ижроия қўмитаси Марсель марказидаги тўқнашувларга кескин эътирозини билдиради. Англия ва Россия термалари мухлисларининг бундай феъл-атворига футболда йўл қўйиб бўлмайди», — дейилади баёнотда.
Ижроия қўмитаси икки давлат ассоциацияларига огоҳлантириш берди. Хулқ-атвор инстанциялари қабул қиладиган қарордан қатъий назар, қўмита Англия ва Россия бош футбол ташкилотларига иккала терма жамоани мусобақадан четлаштиришгача бўлган қўшимча санкциялар жорий этиш ҳуқуқини ўзида қолдиради, деб таъкидланади ҳужжатда.
«Биз Англия футбол уюшмаси ва Россия футбол иттифоқи мухлисларига мурожаат этиб, ўзларини муносиб тутишларини сўрашларини қатъиян талаб қиламиз. Шунингдек, бу вазиятда турнир хавфсиз шарт-шароитда ўтиши учун барча ишни қилаётган ташкилотчилар ҳамда Франция ҳуқуқ-тартибот кучларини қўллаб-қувватлашимизни билдирамиз», — қўшимча қилинади УЕФАнинг мурожаатида.
Эслатиб ўтамиз, Россия ва Англия терма жамоалари ўртасидаги учрашувдан сўнг икки жамоа фанатлари ўртасида тўқнашув юзага келди, кейинчалик эса улар маҳаллий аҳоли билан можарога киришди.
Илгарироқ УЕФА Марселдаги тартибсизликларни кескин қоралаб чиққан эди.
Изоҳ (0)