Яманда араб коалицияси авиаҳужумлари натижасида болалар ҳуқуқлари бузилиши, шунингдек, уларнинг ўлимида айбдор бўлган мамлакатлар «қора рўйхат»идан Саудия Арабистонини чиқариш ҳақидаги қарор Ар-Риёд тарафдорлари томонидан қатъий босим остида қабул қилинган. Бу ҳақда БМТ бош котиби Пан Ги Мун маълум қилди, деб ёзади «Интерфакс».
Унинг аниқлик киритишича, Саудия Арабистони ва унинг тарафдорлари БМТни, акс ҳолда ташкилотнинг қатор дастурларини молиялаштиришни тўхтатиш билан пўписа қилган.
«Бу мен қабул қилган энг қийин ва оғриқли қарорлардан бири бўлди», — деди Пан Ги Мун. У ўз қадамини кўмак дастури ёпилган тақдирда, Фаластин, Жанубий Судан, Сурия, Ямандаги миллионлаб болалар азобда қолиши билан изоҳлади.
Саудия Арабистони ва унинг раҳбарлигида Яманда исёнчи хусийларга қарши курашаётган араб коалицияси Яман ҳудудига авиаҳужумлар уюштириб, болаларнинг ялпи ўлимига сабаб бўлгани учун мамлакатлар «қора рўйхат»ига тушиб қолган эди. Келтирилган маълумотга кўра, араб коалицияси 780 дан ортиқ боланинг ўлими ҳолатларининг 60 фоизида айбдор бўлиб чиққан. Ар-Риёд эса маълумотлар ҳақиқатга тўғри келмаслигини айтиб, улар қайта кўриб чиқилишини талаб қилди. Шундан сўнг БМТ уни рўйхатдан чиқарган эди.
Изоҳ (0)