2015 йилда Ўзбекистонда 2,5 тонна гиёҳванд модда мусодара қилинди

2015 йилда Ўзбекистонда гиёҳванд моддаларнинг ноқонуний тарқатилиши билан боғлиқ 6648 жиноят фош этилди. 2014 йилда бу кўрсаткич 6698 га тенг эди. Бу рақамлар Вазирлар Маҳкамаси ҳузуридаги наркотик моддаларни назорат қилиш миллий ахборот-таҳлил марказининг йиллик таҳлилий шарҳида келтирилди, деб хабар беради «Газета.uz».

Гиёҳвандлик билан боғлиқ жиноятларнинг 3017 таси наркотик сотиш (2014 йилда — 3062), 709 таси — гиёҳванд моддалар контрабандаси (2014 йилда — 607), 1301 таси — гиёҳванд моддаларга эга ўсимликларни ноқонуний етиштириш билан боғлиқдир (2014 йилда — 1320).

Ҳисобот даврида 2,5 тоннадан ортиқроқ гиёҳванд моддалар (2014 йилда — 2,2 тонна), шу жумладан, 147,9 килограмм героин (2014 йилда — 106,5 килограмм), 882,3 килограмм афюн (2014 йилда — 881,9 килограмм), 1 тоннадан ортиқ марихуана (2014 йилда — 802,9 килограмм), 250,2 килограмм гашиш (2014 йилда — 100 килограмм), 204,7 килограмм кўкнор (2014 йилда — 406,4 килограмм) ҳамда 7184 психотроп моддалар таблеткалари (2014 йилда — 18590) мусодара қилинди.

Йил давомида Афғонистондан келтирилган «эгасиз» наркотикларни чегара ҳудудлардаги махфий жойларда, шунингдек, Афғонистон ва Тожикистондан транзит билан Ўзбекистон орқали ўтган юк поездларида яшириш билан боғлиқ 50 та факт қайд қилинди. Жами 194 килограмм наркотик, шу жумладан, 101 килограмм афюн ва 27,3 килограмм героин ушлаб қолинди.

Ўзбекистон ҳудудида наркотик моддаларнинг ноқонуний тарқатилиши билан боғлиқ жиноятлар туфайли 138 (2014 йилда — 100) чет эл фуқароси қўлга олинди. Уларнинг ёнидан 364 килограмм наркотик моддалар (2014 йилда — 133,3 килограмм), 1400 дан ортиқ психотроп моддалар таблеткалари (2014 йилда — 1500), шунингдек, 7800 литр ва 89,8 грамм прекурсорлар (2014 йилда — 1610 литр ва 262,8 грамм) топилди. Қўлга олинган шахсларнинг кўпчилик қисми Афғонистон (33, 2014 йилда — 19), Тожикистон (27, 2014 йилда — 25), Россия (24, 2014 йилда — 22) ва Қозоғистон (9, 2014 йилда —5) фуқароларидир.

Ҳуқуқ-тартибот органларининг «Қорадори–2015» операцияси давомида гиёҳванд моддаларга эга ўсимликларни етиштириш билан боғлиқ 1049 ҳолат (2014 йилда — 1125) аниқланиб, умумий майдони 5132 квадрат метрга тенг экин майдонлари йўқ қилинди (2014 йилда — 6692 квадрат метр).

Суд органларининг маълумотларига қараганда, 2015 йилда гиёҳванд моддаларнинг ноқонуний тарқатилиши билан боғлиқ 3523 жиноий иш кўриб чиқилди (2014 йилда — 3433). 4578 (2014 йилда — 4568) шахсга нисбатан жазо чоралари кўрилди.