Канада — Ўзбекистон 2:1. Самвел Бабаяннинг ғалабали юришига Канада якун ясаб берди

Футбол бўйича 2018 йил Россияда бўлиб ўтадиган Жаҳон Чемпионати сари ҳаракат қилаётган Ўзбекистон миллий терма жамоаси 7 июнь куни Австрияда Канада термасига қарши ўртоқлик ўйинида майдонга тушди.

• Канада — Ўзбекистон 2:1. Матнли онлайн

Беллашувнинг 20-дақиқасига келиб канадалик футболчилар Дэвид Эдгарнинг голидан сўнг ҳисобда олдинга чиқиб олган бўлса, иккинчи бўлимнинг 15-дақиқасида Элдор Шомуродов мувозанатни тиклади — 1:1. Бунда «Бунёдкор» аъзосини пас билан Александр Гейнрих таъминлади.

Бироқ ўзбекистонлик футболчилар дуранг натижани сақлаб қола олмади. 80-дақиқага келиб «Бунёдкор»нинг бошқа бир аъзоси Акром Комилов ўз дарвозасини ишғол қилиб, Канаданинг ғалабасига қарашиб юборди.

Ўзбекистон миллий терма жамоаси бош мураббийи Самвел Бабаян бунга қадар кетма-кет саккиз беллашувнинг барчасида зафар қучишга муваффақ бўлганди. Мутахассис бош жамоадаги биринчи мағлубиятини Канада термасига қарши ўртоқлик ўйинида қабул қилиб олди.

Канадага қарши беллашувда терма жамоанинг етакчи футболчилари ҳисобланган Одил Аҳмедов, Сардор Рашидов, Азиз Ҳайдаров, Анзур Исмоилов ва Виталий Денисов ҳаракат қилмади. Бу футболчиларга бош мураббий дам беришга қарор қилган ва улар Австрия сафаридан тушиб қолган.

1 сентябрь куни Ўзбекистон терма жамоаси ЖЧ—2018 3-саралаш босқичининг 1-турида Сурияни қабул қилади. Унга қадар терма жамоалар маркази ҳозирча ўртоқлик ўйини режалаштирмаган.

• ЖЧ—2018 учун кураш олиб бораётганлардан Япония, Эрон ва Хитой ўртоқлик ўйинларида зафар қучди (видео)

• Ўзбекистоннинг ЖЧ йўлидаги рақиби Жанубий Корея Евро—2016 иштирокчисини таслим қилди (видео)

Халқаро ўртоқлик учрашуви 7 июнь, сешанба

Канада — Ўзбекистон 2:1

Гол: Дэвид Эдгар, 20 (1:0). Элдор Шомуродов, 61 (1:1). Акром Комилов, 81-авт (2:1).Ўзбекистон: Александр Лобанов — Даврон Ҳошимов (Шуҳрат Муҳаммадиев, 60), Егор Кримец (Шерзод Аъзамов, 46), Ислом Тўхтахўжаев, Акром Комилов — Жавоҳир Соҳибов, Отабек Шукуров, Сервер Жепаров (Жасур Ҳасанов, 76) — Элдор Шомуродов, Александр Гейнрих (Достон Ҳамдамов, 68), Игорь Сергеев.

• Сўровнома. Канада — Ўзбекистон: вариантлардан қайси бири фантастикага яқинроқ?