Нигерия ҳукумати коррупцияга қарши кураш доирасида 9,1 млрд долларни қайтарди

Нигерия ҳукумати бир йил ичида давлат хазинасига аввалроқ ўғирланган 9,1 миллиард долларлик пул маблағлари ва активларни қайтарди, деб ёзади «ТАСС».

Reuters маълумотларига кўра, 2015 йилда сайланган Нигерия президенти Муҳаммаду Бухари коррупцияга қарши кураш бошлаб, нефть секторидан ўғирланган пул маблағини қайтаришга ваъда берган эди.

«2015 йилнинг 29 майидан жорий йилнинг 25 майигача мамлакатга қайтаришга муваффақ бўлинган нақд пул ва активлар суммаси 9,1 миллиард долларни ташкил қилди», — деди Нигерия ахборот вазири Лая Муҳаммад.

Вазирнинг махсус маслаҳатчиси Сеган Адейеми ушбу пул маблағларининг барчаси жисмоний шахслардан мусодара қилинганини айтди. «Қайтарилган маблағлар аввалги ҳукумат амалдорларининг шахсий ҳисобларида бўлган, давлат хизматидан кетгач эса мансабдорлар эгалик қиладиган пул маблағлари ҳақидаги ахборот фош этилмаган», — деди у.