Ироқнинг Ал-Фаллужа шаҳри кўчаларида ИШИД радикал гуруҳининг жаллодларидан таркиб топган махсус «ўлим отрядлари» пайдо бўлди. Уларнинг мақсади шаҳардан қочишга ёки ҳукумат қўшинларига таслим бўлишга уринганларни ўлдиришдан иборатдир. Бу ҳақда, Independent газетаси маълумотига таяниб, «РИА Новости» хабар бермоқда.
«ИШИД гуруҳи жангарилари Ал-Фаллужада уйини тарк этган ёки оқ байроқни улоқтирган ҳар қандай одамни ўлдиришини маълум қилмоқда», — дейди қариндошлари ва дўстлари жангарилар томонидан эгаллаб олинган шаҳарда бўлган Аҳмед Ал-Дулаймий.
Ироқ бош вазири Ҳайдар ал-Ободий 23 май, душанбага ўтар кечаси Ал-Фаллужани ИШИД жангариларидан озод қилиш бўйича операциянинг бошланганлиги ҳақида эълон қилди. Операция бошлангандан бир неча соат ўтиб, мамлакат федерал полицияси хавфсизлик кучлари Ал-Фаллужа шаҳрининг Ҳарарият туманини озод қилганлиги маълум бўлди.
Кейинроқ Ироқ ҳукумат кучлари жангарилардан Ал-Фаллужанинг шарқидаги Ал-Карма туманини озод қилди. Шунингдек, Ироқ армияси ҳарбий қўмондонлиги маълумотлар бюроси 23 май, душанба куни мамлакатда ИШИДнинг 36 нафар жангариси, жумладан, Ал-Фаллужа шаҳридаги жангарилар етакчиси Ҳожи Ҳамзанинг йўқ қилинганлигини маълум қилди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)