Iroqning Al-Falluja shahri ko‘chalarida IShID radikal guruhining jallodlaridan tarkib topgan maxsus “o‘lim otryadlari” paydo bo‘ldi. Ularning maqsadi shahardan qochishga yoki hukumat qo‘shinlariga taslim bo‘lishga uringanlarni o‘ldirishdan iboratdir. Bu haqda, Independent gazetasi ma’lumotiga tayanib, “RIA Novosti” xabar bermoqda.
“IShID guruhi jangarilari Al-Fallujada uyini tark etgan yoki oq bayroqni uloqtirgan har qanday odamni o‘ldirishini ma’lum qilmoqda”, — deydi qarindoshlari va do‘stlari jangarilar tomonidan egallab olingan shaharda bo‘lgan Ahmed Al-Dulaymiy.
Iroq bosh vaziri Haydar al-Obodiy 23-may, dushanbaga o‘tar kechasi Al-Fallujani IShID jangarilaridan ozod qilish bo‘yicha operatsiyaning boshlanganligi haqida e’lon qildi. Operatsiya boshlangandan bir necha soat o‘tib, mamlakat federal politsiyasi xavfsizlik kuchlari Al-Falluja shahrining Harariyat tumanini ozod qilganligi ma’lum bo‘ldi.
Keyinroq Iroq hukumat kuchlari jangarilardan Al-Fallujaning sharqidagi Al-Karma tumanini ozod qildi. Shuningdek, Iroq armiyasi harbiy qo‘mondonligi ma’lumotlar byurosi 23-may, dushanba kuni mamlakatda IShIDning 36 nafar jangarisi, jumladan, Al-Falluja shahridagi jangarilar yetakchisi Hoji Hamzaning yo‘q qilinganligini ma’lum qildi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)