Тошкентнинг Бобур ва Шота Руставели кўчалари чорраҳаси яқинида 24 май, сешанба куни 126-йўналиш бўйлаб ҳаракатланувчи Isuzu автобуси ва уч автомобиль иштирокида йўл-транспорт ҳодисаси юз берди. Бу ҳақда Facebook’даги «Водители Ташкента (Drivers.uz)» гуруҳида фотохабар қолдирилган.
Хабарга илова қилинган суратларда Captiva’га урилган Isuzu автобуси, орқа томондан берилган зарбдан сўнг бир ғилдираги ариққа тушиб қолган Nexia’ни кўриш мумкин. Ҳодисада қатнашган учинчи автомобиль ҳақида фотохабарда ҳам, унинг остидаги изоҳларда ҳам алоҳида маълумот берилмаган.
Ҳодиса гувоҳларининг сўзларига кўра, автобуснинг чап тарафидан Matiz русумли машина суқилиб кирганидан сўнг, автобус ҳайдовчиси авариядан қочиш мақсадида рулни ўнгга бурган, бироқ йўл ёқасидаги бошқа машиналарни туртиб ўтган. Воқеа натижасида жабрланганлар тўғрида аниқ маълумот йўқ.
«Водители Ташкента (Drivers.uz)»нинг баъзи аъзолари қайд этилган чорраҳанинг бу қисмида автотураргоҳ ҳудуди йўқлиги, йўл ёқасига автомобиллар қоидага зид равишда қўйилгани ҳақида ёзган. Айни вақтда, бошқа бир гуруҳ фойдаланувчилар у ерда «Тўхташ тақиқланган» йўл белгиси йўқлигини қайд этган.
Изоҳ (0)