Toshkentning Bobur va Shota Rustaveli ko‘chalari chorrahasi yaqinida 24-may, seshanba kuni 126-yo‘nalish bo‘ylab harakatlanuvchi Isuzu avtobusi va uch avtomobil ishtirokida yo‘l-transport hodisasi yuz berdi. Bu haqda Facebook’dagi “Voditeli Tashkenta (Drivers.uz)” guruhida fotoxabar qoldirilgan.
Xabarga ilova qilingan suratlarda Captiva’ga urilgan Isuzu avtobusi, orqa tomondan berilgan zarbdan so‘ng bir g‘ildiragi ariqqa tushib qolgan Nexia’ni ko‘rish mumkin. Hodisada qatnashgan uchinchi avtomobil haqida fotoxabarda ham, uning ostidagi izohlarda ham alohida ma’lumot berilmagan.
Hodisa guvohlarining so‘zlariga ko‘ra, avtobusning chap tarafidan Matiz rusumli mashina suqilib kirganidan so‘ng, avtobus haydovchisi avariyadan qochish maqsadida rulni o‘ngga burgan, biroq yo‘l yoqasidagi boshqa mashinalarni turtib o‘tgan. Voqea natijasida jabrlanganlar to‘g‘rida aniq ma’lumot yo‘q.
“Voditeli Tashkenta (Drivers.uz)”ning ba’zi a’zolari qayd etilgan chorrahaning bu qismida avtoturargoh hududi yo‘qligi, yo‘l yoqasiga avtomobillar qoidaga zid ravishda qo‘yilgani haqida yozgan. Ayni vaqtda, boshqa bir guruh foydalanuvchilar u yerda “To‘xtash taqiqlangan” yo‘l belgisi yo‘qligini qayd etgan.
Izoh (0)