Ўзбекистонга расмий ташриф билан келган Корея бош вазири Хван Гё Ан 20 май куни Тошкентда Корейс маданияти ва санъати уйи қурилиши ишларининг бошланишига бағишланган маросимда иштирок этди. Бу ҳақда UZ24 хабар бермоқда.
2017 йилда қуриб битказилиши мўлжалланаётган Корейс маданияти ва санъати уйи корейс халқининг бой маданияти ва ўзига хос санъати, урф-одатлари ва анъаналарини сақлаш ва тарғиб қилиш учун қулай замин яратади.
«Мамлакатларимиз жўғрофий жиҳатдан бир-биридан узоқ бўлса-да, маданиятимиз ва анъаналаримиз ўхшаш, халқларимизнинг фазилатлари ва мақсадлари муштарак. Жанубий Корея билан Ўзбекистон ўртасида 1992 йилда дипломатик алоқалар ўрнатилганидан сўнг қисқа фурсатда икки томонлама муносабатлар стратегик ҳамкорликнинг юксак даражасига кўтарилгани бизни жуда қувонтиради», — деди Корея бош вазири Хван Гё Ан.
Корейс маданияти ва санъати уйини ташкил қилиш тўғрисида Ўзаро англашув меморандуми Корея Республикаси Президентининг 2014 йил июнь ойидаги Ўзбекистонга давлат ташрифи доирасида имзоланган эди.
Изоҳ (0)