БМТ котибияти EgyptAir авиакомпаниясига тегишли A320 йўловчи самолётининг ғойиб бўлиши атрофидаги вазиятни диққат билан кузатмоқда ва ҳодисанинг сабаблари аниқ бўлишини кутмоқда. Бу ҳақда БМТ бош котибининг расмий вакили Стефан Дюжаррик журналистларга маълум қилди, деб ёзади «ТАСС».
«Биз катта хавотир билан вазиятни кузатмоқдамиз ва юз берган ҳодиса очиқланишини кутмоқдамиз», — деди у. Унинг сўзларига кўра, ҳозирча воқеа сабаби аниқланмаган, БМТдагилар бу борада тахминларни илгари сурмоқчи эмас.
Париждан Қоҳирага учаётган самолёт Греция ҳаво ҳудудига киргандан 20 дақиқа ўтиб, радарлардан ғойиб бўлди. MS804 рейси бортида 56 нафар йўловчи (улардан уч нафари бола) ва ўн нафар экипаж аъзоси бор эди. Уларнинг тақдири ҳозирча номаълум.
«Маядин» телеканали, EgyptAir авиакомпаниясидаги манбасига таяниб, самолёт Ўрта Ер денгизига қулаганини билдирганди.
Илгарироқ АҚШ разведкаси ҳалокатнинг асосий сабаби сифатида терактни кўраётгани хабар қилинган эди. Бундан ташқари, Миср фуқаролик авиацияси вазири Шариф Фатҳий террорчилик ҳужуми ақлга келаётган биринчи эҳтимол эканлигини тан олганди.
Изоҳ (0)