Жанубий Хитойдаги Гуандун провинцияси, Дунгуань шаҳри полицияси 28,7 миллиард юань (4,4 миллиард доллар) миқдоридаги ноқонуний валюта операцияларини амалга оширишда гумон қилинаётган яширин банкчиларнинг икки гуруҳини қамоққа олди. Бу ҳақда «ТАСС» хабар бермоқда.
Полиция маълумотларига кўра, жиноятчилар қариндошлари томонидан чет элда очилган ҳисоб рақамларидан фойдаланиб, валютага оид ноқонуний операциялар билан шуғулланган.
130 нафар ҳуқуқ-тартибот ходими иштирок этган полиция рейдлари давомида Чанпин ва Цинси посёлкаларида 11 киши қўлга олиниб, улардан 15 миллион юань (2,3 миллион доллар) ва 504 минг Гонконг доллари (64,9 минг доллар) нақд ҳолда мусодара қилинди. Яширин банкчиларнинг 6 кишидан иборат иккинчи гуруҳи Ляобу ва Далан посёлкаларида қўлга олинди.
Полиция, шунингдек, 27,1 миллион юань (4,2 миллион доллар) сақланган жами 210 ҳисоб рақамни музлатиб қўйди.
Изоҳ (0)