Бутун дунё бўйича интернетни тадқиқ қилиш билан шуғулланадиган DYN Research компанияси Ироқ ҳудудида 14, 15 ва 16 май кунлари эрталаб 5 дан 8 гача интернет ишламаганини қайд этди, деб ёзади TJournal.
Кейинроқ маълум бўлишича, Ироқ ҳукумати кетма-кет иккинчи йил мактаб ўқувчилари учун имтиҳон ўтказиладиган вақтда интернетни бутун мамлакат бўйлаб ўчириб қўйган. Бу ўқувчилар интернетдан шпаргалка сифатида фойдалана олмаслигини кўзлаб қилинган.
Маълумотларга кўра, Ироқ алоқа вазирлиги маҳаллий провайдер ва уяли алоқа операторларини интернетни, жумладан мобил интернетни ҳам бир неча соатга ўчириб қўйишга тўғри келиши ҳақида олдиндан огоҳлантирган.
2015 йилда Ироқ ҳукумати имтиҳонлар баҳонасида биринчи марта бутун мамлакатда интернетни ўчирган эди. Ўшанда маҳаллий блогерлар Американинг ҳуқуқни ҳимоя қилиш ташкилоти билан ҳамкорликда Ироқ алоқа вазирига расмий хат ёзиб, БМТнинг ахборотга эга бўлиш эркинлиги тўғрисидаги моддасига кўра, маҳаллий ҳукумат интернетни ҳар қандай сабаб билан блоклаб қўйишга ҳақи йўқлигини таъкидлаган эди. Аммо ҳукумат мурожаатни жавобсиз қолдирган эди.
Изоҳ (0)