Ўзбекистон Россияга Ravon R2 автомобилларини жўнатишни бошлади

GM Uzbekistan ҚК Россияга Ravon R2 (Chevrolet Spark муқобили) модели автомобилларини жўнатишни бошлади. Бу ҳақда, Ravon сайтига асосланиб, «Газета.uz» ёзмоқда.

Жорий йил охирига қадар компания ушбу моделдаги 2500 тача автомобиль сотишни режалаштирмоқда.

Машиналарни муваффақиятли тарзда етказиб бериш ва сотишни таъминлаш учун компания дистрибьюторлар ва дилерлар билан фаол иш олиб бормоқда, дейилади хабарда.

GM Uzbekistan ишлаб чиқарадиган кейинги модель Nexia седани бўлади. Ўзбекистонда улар Chevrolet Nexia, экспорт бозорларида эса Ravon Nexia R3 номи остида сотилади.

Айни пайтда, GM Uzbekistan’нинг Асакадаги заводида икки янги моделни ишлаб чиқариш учун зарур бўлган барча ишга тушириш-созлаш ва синов ишлари амалга оширилди.

GM Uzbekistan Ravon дилерлик тармоқларини кенгайтириш ва Ravon R4 (Cobalt) моделини ишлаб чиқиш билан моделлар сафини янгилаш борасидаги ишларни давом эттирмоқда.

Россияда октябрь ойида тақдим этилган Ravon бренди жорий йилда МДҲнинг бошқа бозорлари, шу жумладан, Қозоғистонда ҳам савдога чиқарилади.