Дунёдаги энг катта саёҳат кемаси Франциядан сафарга жўнади

Дунёдаги энг катта круиз лайнери — Harmony of the Seas — 15 май, якшанба куни тахминан 13:45 (Тошкент вақти билан 16:45)да Франциянинг Сен-Назер шаҳри портини тарк этиб, ўзининг биринчи узоқ денгиз сафарига отланди, дея хабар бермоқда «РИА Новости».

Кема Буюк Британия жанубий қирғоқларидаги Саутгемптон портига йўл олди, у ерда бортга илк йўловчиларни олади. Сўнг кема Барселонага бориб, у ердан Ўртаер денгизи бўйлаб дастлабки денгиз сафарини бошлайди.

Harmony of the Seas’нинг сув сиғими 227,5 минг тоннани, эни 66 метр, узунлиги 362 метрни ташкил этади. Унинг бортига 6,4 минг йўловчи ва 2 мингдан ортиқ экипаж аъзоси сиғиши мумкин. Лайнернинг баландлиги эса 72 метр бўлиб, бу 20 қаватли бино билан тенг демакдир.

Лайнерда яхмалак, казино, 1,4 минг ўриндиқли театр, спорт заллари, бассейнлар, баскетбол майдони, сув тепаликлари ва бошқа аттракционлар, юз метрлик савдо растаси ҳамда 12 мингта турли ўсимликлардан иборат боғ мавжуд. Бундан ташқари, бортда 30 та кафе ва ресторан бўлиб, улардан бири — Bionic bar’да роботлар официантлик қилади.

Кема қурилиши 2,5 йил вақт олди ва қарийб бир миллиард еврога тушди.