Dunyodagi eng katta kruiz layneri — Harmony of the Seas — 15-may, yakshanba kuni taxminan 13:45 (Toshkent vaqti bilan 16:45)da Fransiyaning Sen-Nazer shahri portini tark etib, o‘zining birinchi uzoq dengiz safariga otlandi, deya xabar bermoqda “RIA Novosti”.
Kema Buyuk Britaniya janubiy qirg‘oqlaridagi Sautgempton portiga yo‘l oldi, u yerda bortga ilk yo‘lovchilarni oladi. So‘ng kema Barselonaga borib, u yerdan O‘rtayer dengizi bo‘ylab dastlabki dengiz safarini boshlaydi.
Harmony of the Seas’ning suv sig‘imi 227,5 ming tonnani, eni 66 metr, uzunligi 362 metrni tashkil etadi. Uning bortiga 6,4 ming yo‘lovchi va 2 mingdan ortiq ekipaj a’zosi sig‘ishi mumkin. Laynerning balandligi esa 72 metr bo‘lib, bu 20 qavatli bino bilan teng demakdir.
Laynerda yaxmalak, kazino, 1,4 ming o‘rindiqli teatr, sport zallari, basseynlar, basketbol maydoni, suv tepaliklari va boshqa attraksionlar, yuz metrlik savdo rastasi hamda 12 mingta turli o‘simliklardan iborat bog‘ mavjud. Bundan tashqari, bortda 30 ta kafe va restoran bo‘lib, ulardan biri — Bionic bar’da robotlar ofitsiantlik qiladi.
Kema qurilishi 2,5 yil vaqt oldi va qariyb bir milliard yevroga tushdi.
Izoh (0)