Чекка қишлоқларда 194 та маиший хизматлар кўрсатиш мажмуаси ташкил этилади
2016 йилда Ўзбекистоннинг чекка қишлоқларида 194 та намунавий маиший хизматлар кўрсатиш мажмуалари ташкил этилади, дея хабар бермоқда «Газета.uz» Вазирлар Маҳкамасининг 4 майдаги қарори (pdf)га таяниб.
«Гўзаллик салонлари», сартарошхоналар, ҳаммомлар, модалар ательеси, электр-маиший техника ва пойабзал таъмирлаш хизматлари кўрсатувчи устахоналарни ўз ичига олувчи маиший хизматлар кўрсатиш мажмуаларининг намунавий лойиҳалари Давлат архитектура ва қурилиш қўмитаси томонидан ишлаб чиқилади.
Маиший хизмат кўрсатиш мажмуалари қурилишига Ўзбекистон Республикаси Марказий банкининг қайта молиялаштириш ставкасидан юқори бўлмаган фоиз ставкаси бўйича кредитлар берилади. 194 та мажмуа қурилишига жами 62,111 миллиард сўм, шу жумладан, 19,776 миллиард сўм банк кредитлари сарфланиши режалаштирилмоқда.
Янги мажмуаларни очишдан кўзланган мақсад аҳолига сервис хизмати кўрсатишни яхшилаш, аёлларнинг уй меҳнатини енгиллаштириш, қўшимча иш ўринлари ташкил этиш ва аҳоли даромадларини кўпайтиришдир.
