Нуфузи жиҳатдан Европа клубларининг иккинчи рақамли мусобақаси бўлмиш Европа Лигасида финал иштирокчилари номи аниқланди. Унга кўра, Англиянинг «Ливерпуль» клуби ҳал қилувчи ўйинда Испаниянинг «Севилья» клубига қарши саф тортади.
Европа Чемпионлар Лигасининг финали Мадрид дербисига айланганидан кейин, Европа Лигаси финалида ҳам Испаниянинг икки жамоаси тўп суриши мумкинлиги кун мавзуси бўлиб қолган бир пайтда, «Вильярреал» ярим финални муваффақиятсиз якунлади. «Энфилд» стадионида меҳмон бўлган Мерселино Тораль жамоаси 0:3 ҳисобида имкониятни бой берди.
Маълумот учун, «Вильярреал» Испания Ла Лигасида кучли тўртликка кириб, келаси мавсумни Европа Чемпионлар Лигасида ўтказиши аниқ бўлиб улгурган. Англия Премьер-лигасида дастлабки тўрт поғонадан бирини эгаллаши даргумон бўлган «Ливерпуль» Чемпионлар Лигасига йўлланма олишни истаса, Европа Лигасида зафар қучиши керак бўлади.
Бу йўлда Юрген Клопп жамоаси мусобақанинг сўнгги икки йилликдаги ғолиби «Севилья»ни мағлуб этиши керак бўлади. Ярим финалда Украинанинг «Шахтёр» клубига чиқиш эшикларини кўрсатиб қўйган «Севилья»да тарихда биринчи марта кетма-кет учта чемпионликни тантана қилиш имконияти бор.
Европа Лигасининг финал беллашуви 18 май куни Базель шаҳрида бўлиб ўтади.
Европа Лигаси Ярим финал. Жавоб ўйинлари 5 май, пайшанба
Изоҳ (0)