“Liverpul” va “Sevilya” klublari Yevropa Ligasining finaliga yo‘llanma oldi

Nufuzi jihatdan Yevropa klublarining ikkinchi raqamli musobaqasi bo‘lmish Yevropa Ligasida final ishtirokchilari nomi aniqlandi. Unga ko‘ra, Angliyaning “Liverpul” klubi hal qiluvchi o‘yinda Ispaniyaning “Sevilya” klubiga qarshi saf tortadi.

Yevropa Chempionlar Ligasining finali Madrid derbisiga aylanganidan keyin, Yevropa Ligasi finalida ham Ispaniyaning ikki jamoasi to‘p surishi mumkinligi kun mavzusi bo‘lib qolgan bir paytda, “Vilyarreal” yarim finalni muvaffaqiyatsiz yakunladi. “Enfild” stadionida mehmon bo‘lgan Merselino Toral jamoasi 0:3 hisobida imkoniyatni boy berdi.

Ma'lumot uchun, “Vilyarreal” Ispaniya La Ligasida kuchli to‘rtlikka kirib, kelasi mavsumni Yevropa Chempionlar Ligasida o‘tkazishi aniq bo'lib ulgurgan. Angliya Premyer-ligasida dastlabki to‘rt pog‘onadan birini egallashi dargumon bo‘lgan “Liverpul” Chempionlar Ligasiga yo'llanma olishni istasa, Yevropa Ligasida zafar quchishi kerak bo‘ladi.

Bu yo‘lda Yurgen Klopp jamoasi musobaqaning so‘nggi ikki yillikdagi g‘olibi “Sevilya”ni mag‘lub etishi kerak bo‘ladi. Yarim finalda Ukrainaning “Shaxtyor” klubiga chiqish eshiklarini ko‘rsatib qo‘ygan “Sevilya”da tarixda birinchi marta ketma-ket uchta chempionlikni tantana qilish imkoniyati bor.

Yevropa Ligasining final bellashuvi 18-may kuni Bazel shahrida bo‘lib o‘tadi.

Yevropa Ligasi Yarim final. Javob o‘yinlari 5-may, payshanba

“Liverpul” (Angliya) — “Vilyarreal” (Ispaniya) 3:0

“Sevilya” (Ispaniya) — “Shaxtyor” (Ukraina) 3:1