Венесуэла президенти Николас Мадуро ўзининг сиёсий рақиблари унинг ваколатларини муддатидан аввал тўхтатиш бўйича ўтказмоқчи бўлган умумхалқ референдумини ёқлаб қўйилган ҳар битта имзони текширишни буюрди. Бу ҳақда президентнинг ўзи миллий телевидение эфирида маълум қилди, деб ёзади «ТАСС».
У «зарур вақтда Миллий сайлов кенгашига олигархия ва ўнглар вакиллари томонидан бериладиган имзоларнинг барчасини бирма-бир текшириш» учун махсус гуруҳ тузилганини айтди. Унинг фикрича, мухолифат ташаббуси «уни йўқ қилиш орқали конституцияга, Чавес меросига ва халқнинг ютуқларига барҳам бериш»га қаратилган.
Венесуэла конституциясига мувофиқ, давлат арбоби сайланган муддатнинг ярми ўтгач, унинг ваколатларини муддатидан аввал тўхтатиш ҳақидаги референдум ўтказилиши мумкин.
Венесуэла парламентини бошқарувчи мухолифат 10 март, пайшанба куни президент Николас Мадуронинг истеъфоси бўйича референдум ўтказиш ҳақидаги қонун лойиҳасини биринчи ўқишдаёқ маъқуллаган эди.
Венесуэлада ҳукуматнинг қонун чиқарувчи ва ижро этувчи тармоқлари ўртасидаги низолар январда — парламентда сайлов якунларига кўра, кўпчилик ўрнини мухолифат кучлари эгаллаганидан сўнг юзага келган эди.
Изоҳ (0)