АҚШнинг Нью-Мексико штати суди Розуэлл шаҳрида яшовчи Жанетта Гарса Альварезни Facebook ижтимоий тармоғида мактабдаги саросимага сабаб бўлган хабарни эълон қилгани учун бир ойлик қамоққа маҳкум этди, деб ёзади «ТАСС».
Альварез 29 январь куни ёзиб қолдирган хабарида ўғли бир неча саккизинчи синф ўқувчилари мактабга тўппончалар келтириб, у ерда отишма уюштириш режасидан хабар топгани ҳақида огоҳлантирган. Пост ота-оналарни ҳам, болаларни ҳам жуда қўрқитиб юборган. Эртаси куни 160 га яқин ўқувчи дарсга келмаган, мактабга эса юзлаб телефон қўнғироқлари бўлган.
Мактаб маъмурияти Альварезни ваҳимали кайфиятни юзага келтиришда айблади. Шу ҳафта бошида эса у суд томонидан жамоатчилик тартибини бузганликда айбдор деб топилди. Кейинга суриладиган қамоқ жазосидан ташқари, унга суд жараёнини ўтказиш билан боғлиқ харажатлар учун 29 доллар тўлаш мажбурияти юкланди.
Мактаб директори Альварез бу ҳақда Facebook’да эълон қилиш ўрнига, ўқув муассасаси раҳбарияти ёки полицияни огоҳлантириши керак эди, деб ҳисоблайди. Аёлнинг адвокати эса апелляция бериш ниятини билдирди. У Альварезнинг ҳеч қандай қонунни бузмаганини ва мактаб маъмуриятига мурожаат қилишга мажбур эмаслигини таъкидлади.
Ўқувчилар ҳақиқатан ҳам отишма уюштирмоқчи бўлган-бўлмагани ҳозирча аниқлаштирилмоқда.
Изоҳ (0)