Мюнхеннинг «Бавария» футбол клуби бош мураббийи Хосеп Гвардиола «Атлетико Мадрид»га қарши Европа Чемпионлар Лигаси ярим финал дастлабки учрашуви олдидан ўз фикрлари билан ўртоқлашди, дея хабар бермоқда УЕФА расмий сайти.
«Ярим финалга қадар етиб келганимиздан мамнунмиз ва бу босқичда барча жамоалар, хусусан, ‘Атлетико’ ҳам кучли эканини биламиз. Бу жамоани ‘Барселона’ ва ‘Реал Мадрид’ билан таққослаш мумкин. Улар Европа грандларига қарши ўйинларда яхшигина қаршилик кўрсата олади. Симеоне ‘Атлетикў бош мураббийи сифатида кўп натижаларга эришди. Бизни аъло даражадаги ўйин, тўлақонли ва томошабоп футбол спектакли кутиб турибди. Финалга чиқиш учун қўлимиздан келганини қиламиз», — деди Гвардиола.
«‘Атлетико’ — серқирра жамоа. Мен уларга қарши беш йилдан бери ўйнаганим йўқ. Мутахассисларнинг айтишича ва ўзим ҳам гувоҳ бўлиб турганимдек, бу жамоа жуда яхши ҳимояланади. Бироқ ‘Атлетико’нинг устунликлари шу билан тугаб қолмайди. Мадридликлар ўз стратегияси бўйича усталик билан ҳаракат қилади, Коке стандарт вазиятларни зўр амалга оширади, ҳимоя яхши ташкил этилган, рақиб учун бўш ҳудудлар қолдирмайди ва қарши ҳужумларда қойилмақом ҳаракат қилади», — деди «Бавария» устози.
«Сўнгги уч-тўрт йилдан бери ‘Атлетико’ Испанияда чемпионлик учун курашмоқда, Европада эса энг юксак совринлар учун даъвогар, шу сабабли ҳам, уни мағлуб этиш учун деярли бехато ўйнаш керак. Биз бу рақибнинг ўйинларини кўп ўргандик, энди амалда унга муаммолар ярата олишимиз зарур», — деди мадридликлар бош мураббийи.
«Футболда рақибга мослашиш керак, биз энг ижобий натижага эришиш имконини берадиган даражада рақибга мослашишга уринамиз. Уч йил ичида ‘Бавария’ уч марта Чемпионлар Лигаси ярим финалига чиқди. Биламан, Чемпионлар Лигасидаги ғалабасиз менинг ‘Баварияъдаги фаолиятимни тугал муваффақиятли деб бўлмайди, дейдиган кишилар бор. Ҳар нима бўлганда ҳам, Германияда ишлаш тажрибасига эга бўлганимдан жуда бахтиёрман. Назаримда, мен нисбатан вазминлашдим, мураббий ва инсон сифатида ўсдим», — дея қўшимча қилди «Бавария» бош мураббийи Хосеп Гвардиола.
Аввалроқ «Атлетико Мадрид» бош мураббийи Диего Симеоне унинг шогирдлари «Бавария»га қарши ЕЧЛ ярим финал ўйини олдидан фақат ғалаба ҳақида ўйлаётганини айтиб ўтган эди.
Маълумот учун, «Атлетико Мадрид» — «Бавария» учрашуви 27 апрель, чоршанба куни Тошкент вақти билан 23:45 да бошланади. «Дарё» интернет-нашри мазкур учрашувдан матнли онлайн уюштиради.
Изоҳ (0)