Тошкентнинг Абдурауф Фитрат ва Содиқжон Толипов кўчаларини ажратиб турувчи темирйўл кесишмасида Matiz автомобили йўл ҳаракати қоидаларини қўпол равишда бузиши натижасида ҳалокатли йўл-транспорт ҳодисаси юз беришига бир баҳя қолди.
Facebook’даги «Водители Ташкента» гуруҳида эълон қилинган суратда Matiz темирйўл шлагбауми туширилиб, кесишмани тўсувчи қурилма кўтарилгунига қадар кесишма ичига киргани, бироқ қарама-қарши томондаги тўсувчи қурилмадан ўта олмаганини кўриш мумкин — поезд шундоққина Matiz’нинг ортидан ўтиб кетган.
Гуруҳ аъзолари мазкур ҳолатни кескин танқид қилган. Айни вақтда, кесишма яқинида истиқомат қилувчи фойдаланувчиларнинг ёзишича, бу ерда шундай ҳолатлар тез-тез юз бериб туради.
Йўл ҳаракати қоидаларининг 118-бандига кўра, шлагбаум ёпиқ турган ёки ёпила бошлаган ҳолатда, кесишмани тўсувчи қурилма кўтарилиб турган ёки кўтарила бошлаган ҳолатда, шлагбаум ҳолатидан қатъи назар, светофорнинг тақиқловчи ишорасида, агар кўриниш чегарасидаги масофада кесишмага поезд яқинлашиб келаётган бўлса автомобилларнинг темирйўл кесишмасига кириши тақиқланади. Бундан ташқари, кесишма олдида турган транспорт воситаларини қарама-қарши ҳаракатланиш бўлагига чиқиб айланиб ўтиш ҳам тақиқланади.
Маълумот учун, Маъмурий жавобгарлик тўғрисидаги кодекснинг 130-моддаси 1-қисмига мувофиқ, ҳайдовчиларнинг темирйўл ўтиш жойларидан ўтиш қоидаларини бузиши энг кам иш ҳақининг уч баравари (20 апрель ҳолатига кўра — 390 720 сўм) миқдорида жарима солинишига сабаб бўлади.
Изоҳ (0)