Хитойнинг LeEco компанияси Пекинда ўзининг янги Le 2 смартфонини тақдим этди, дея хабар бермоқда «ТАСС». Ишлаб чиқарувчи таъкидлашича, у юқори техник хусусиятлари ва паст нархи туфайли, флагманларнинг янги «қотил»ига айланади.
Кўпчилик томошабинлар қайд этишича, маросимни олиб борган киши аудитория билан мулоқот чоғида кўп жиҳатдан Американинг Apple компанияси асосчиси Стив Жобснинг услубига тақлид қилган. Буни нафақат маълумотларни тақдим этиш чоғида, балки унинг кийинишида ҳам сезиш мумкин бўлди — унда Жобсга хос классик кийимлар бўлмиш жинси шим ва қора свитер бўлган.
Телефон 5,5 дюймли ромсиз дисплейга эга тўлиқ металл корпусли классик моноблокдир, у ишлаб чиқарувчининг ниятига кўра, юқори хусусиятларга эга смартфоннинг арзон версиясига айланиши керак. Нашр таъкидлашича, компания ушбу ниятига кўп жиҳатдан эришган ҳам: қурилма Heliо X20 ўн ядроли процессор, 32 Гб ички ва 3 Гб тезкор хотира, 3000 мА/с сиғимли батарея, 16 мегапикселли асосий ва 8 мегапикселли олд камерага эга. Телефон Android Marshmallow 6.0.1 операцион тизимида ишлайди. Смартфонда тезкор қувват олиш функцияси мавжуд бўлиб, ишлаб чиқарувчи ишонтиришича, бу тахминан беш дақиқа вақт олади.
Шундай хусусиятларга эга бўла туриб, смартфон нархи 1100 юан (тахминан 170 доллар)ни ташкил этади. LeEco таъкидлашича, бу маҳсулот таннархидан анча арзон, чунки ишлаб чиқарувчининг бизнес модели қўшимча хизматлар — биринчи навбатда, интернет-телевидение, мусиқа ва бошқа контентни сотишдан қўшимча пул ишлашни назарда тутади.
Изоҳ (0)