Канада ҳарбий-денгиз кучлари 2016 йилнинг бошидан буён наркотрафикка қарши CARIBBE халқаро операцияси давомида АҚШ соҳил қўриқлаш хизмати билан биргаликда 4,2 тоннадан ортиқ кокаин, 1,5 тоннадан зиёд марихуанани мусодара қилди. Бу ҳақда Канада мудофаа вазирлигига таяниб, «ТАСС» хабар берди.
«2016 йили тўртта кемамизнинг биринчи навбатчиликка чиқишининг ўзи Кариб денгизи ва Тинч океани шарқий қисмида наркотрафикка қарши курашда ажойиб натижаларни келтирди. Канадалик денгизчиларнинг ҳушёрлиги ва жонбозлиги туфайли Шимолий Америка шаҳарлари кўчаларига бир неча тонна наркотик етказилишининг олди олинди», — дея таъкидлаган Канада мудофаа вазири Харжит Сингх Сажан.
Канада, АҚШ, Франция, Буюк Британия, Испания ва Нидерландия кемалари ҳамда самолётлари сафарбар этилган CARIBBE халқаро операцияси 2006 йилдан бери ўтказиб келинмоқда. Операция Кариб денгизи, Мексика бўғози, Лотин Америкаси, жумладан, Эквадор ва Колумбиянинг Тинч океанидаги қирғоқларини наркотрафикка қарши кураш мақсадида назорат этиб боришни кўзда тутади.
Изоҳ (0)