Ўзбекистонлик трамполинчи Екатерина Хилько бешинчи бор Олимпиада ўйинларида иштирок этади
Бразилиянинг Рио-де-Жанейро шаҳрида трамполин бўйича ўтказилган лицензион мусобақада ўзбекистонлик Екатерина Хилько саралаш босқичидан муваффақиятли ўтиб, кучли саккизликдан жой олди ва энг асосийси Рио–2016 Олимпиада ўйинларига йўлланмани қўлга киритди, деб хабар қилмоқда Ўзбекистон Миллий олимпия қўмитаси матбуот хизмати.
Эътиборлиси, Рио–2016 Олимпиада ўйинлари Екатерина Хильконинг фаолиятидаги бешинчиси бўлади. Тажрибали спортчи 4 йилликнинг энг нуфузли турнирида илк дебютини 2000 йили Сидней (Австралия)да бўлиб ўтган Олимпиада ўйинларида ўтказган эди. Шундан буён Екатерина кетма-кет Олимпиада ўйинларида қатнашиш бахтига муяссар бўлиб келмоқда.
Қайд этиш жоизки, дунё трамполинчилари орасида шу кунга қадар тўрт нафар спортчи тўрт маротабадан Олимпиада ўйинларида қатнашиш ҳуқуқини қўлга киритган эди. Бешинчи бор Олимпиадада иштирок этадиган Екатерина Хилько бу борада жаҳонда якка пешқадамга айланди.
Маълумот учун, Екатерина Хилько 2008 йили Пекин (Хитой)да ўтказилган Олимпиада ўйинларида бронза медалига сазовор бўлган.
Шу тариқа, ўзбекистонлик спортчиларнинг Рио—2016 ўйинларига қўлга киритган йўлланмалари сони 66 тага етди. Улардан 25 таси паралимпиячиларга тегишлидир.
Мавзуга оид:
