Гаага суди «ЮКОС» акциядорларига 50 млрд доллар тўлаш ҳақидаги қарорни бекор қилди

Гаага суди, Россияга «ЮКОС»нинг собиқ акциядорларига 50 миллиард доллар тўлаш мажбуриятини юклаган Гаага арбитражи бу учун зарур ваколатга эга бўлмаганини тан олди, деб ёзади «РИА Новости».

Экспертлар фикрича, ҳозирги қарор турли юрисдикция судларига арбитраж қарорини ижро этишдан бош тортиш имконини беради.

Аввалроқ Россия Гаага судига Москвадан товон пулига эришмоқчи бўлган даъвогарлар сонига мос равишда учта ариза топширган эди. Ушбу даъвогарлар Кипрнинг Hulley Enterprises Limited офшори, Кипрда рўйхатдан ўтган яна бир компания — Veteran Petroleum ва Мэн оролидаги Yukos Universal Limited офшоридир. Уларнинг барчаси Group Menatep Limited’га алоқадор бўлиб, биргаликда «ЮКОС»нинг 70,5 фоизга яқин улушини назорат қилган.

2014 йил июлида Гаагадаги арбитраж суди Россиядан ЮКОС акциядорларига 50 миллиард доллар товон тўлашни талаб қилган, бироқ Россия расмийлари бундан бош тортганди.

2006 йилда Москва ҳакамлар суди солиқ органи аризаси билан «ЮКОС»ни банкрот деб эълон қилган, унинг асосий активлари «Роснефть»га ўтган эди. «ЮКОС» собиқ акциядорлари Гаага судига мурожаат қилиб, компания мажбуран тортиб олингани учун товон пули талаб қилган.