Ўзбекистонда Қандим газни қайта ишлаш мажмуасига (ГҚИМ) тамал тошини қўйишга бағишланган тантанали очилиш маросими бўлиб ўтди. Бу ҳақда «Лукойл» тақдим этган матбуот хабарномасида маълум қилинди.
Маросимда Ўзбекистон Республикаси Бош вазири Шавкат Мирзиёев, «Лукойл» ОАЖ президенти Вагит Алекперов, маҳаллий ҳокимият ва асосий пудратчи ташкилотларнинг вакиллари иштирок этди.
«Қандим газни қайта ишлаш мажмуасининг қурилиши Ўзбекистон газ бойликларини ўзлаштиришда янги босқич бошланганидан далолат беради. Ушбу мажмуа Марказий Осиёдаги энг йирик мажмуалардан бири бўлади, унинг ишлатилиши эса 2 мингдан ортиқ доимий иш ўринларини яратиш имконини беради», — деб таъкидлади Шавкат Мирзиёев.
«Қандим газни қайта ишлаш мажмуаси ўзида энг тажрибали ходимларни ҳамда энг замонавий технологик ечимларни жамлаш билан бирга унда ишлаб чиқариш хавфсизлиги, меҳнат ва атроф-муҳит муҳофазасига оид энг юқори стандартларга риоя этилиши таъминланади. У Ўзбекистондаги бизнинг энг йирик инвестицион лойиҳамиздир», — деди Вагит Алекперов.
Қандим ГҚИМ қурилиши доирасида йиллик қуввати 8,1 миллиард кубометрга тенг бўлган газни қайта ишлаш заводи ҳамда табиий газни йиғиш тизими барпо этилади. Ушбу газни йиғиш тизими тўлиқ қувватда ишлашни бошлаганида 114 та газни қазиб олиш қудуғи, 11 та куст майдончаси ва 4 та йиғиш пунктини ўз ичига олади. 370 километр узунликдаги газ қувури ва 160 километр узунликдаги автомобиль йўллари ётқизилади. Мажмуа ва инфратузилма объектлари қурилишининг авж палласида тахминан 7 минг нафар одамни иш билан таъминлаш режалаштирилмоқда.
Маълумот учун, «Лукойл» «Ўзбекнефтгаз» МХК билан ҳамкорликда «Қандим–Хаузак–Шоди–Қўнғирот» МТБ доирасида Қандим конлари гуруҳини ўзлаштириш лойиҳасини амалга оширмоқда. Гуруҳ 6 та газ конденсати конларидан иборат бўлиб, булар Қандим, Қувачи–Олот, Оққум, Парсанкўл, Ҳожи ва Ғарбий Ҳожи конларидир.
Изоҳ (0)