2016 йил ҳосилидан бошлаб Ўзбекистонда ҳўл мева-сабзавот, картошка, полиз маҳсулотлари ва узум харид қилиш бўйича давлат буюртмаси жорий этилади. Бу Ўзбекистон Республикаси Президенти Ислом Каримов 12 апрель, сешанба куни имзолаган «Мева-сабзавот, картошка ва полиз маҳсулотларини харид қилиш ва улардан фойдаланиш тизимини такомиллаштириш чора-тадбирлари тўғрисида»ги қарорда кўзда тутилган, дея хабар бермоқда «Газета.uz».
Давлат буюртмаси «Ўзбекозиқовқатхолдинг» компанияси таркибига кирадиган қайта ишлаш корхоналарини хом ашё билан таъминлаш, ички истеъмол бозорини қиш—баҳор мавсумида барқарор таъминлаш мақсадида захирага ғамлаш, мева-сабзавот маҳсулотларини экспорт қилишга талабдан келиб чиққан ҳолда шакллантирилади. Янги маҳсулотни кейинчалик қайта ишлаш учун харид қилиш «Ўзбекозиқовқатхолдинг», қиш—баҳор мавсумига маҳсулот ғамлаш «Ўзбекозиковқатзахира» ассоциацияси, экспорт эса «Ўзагроэкспорт» компанияси томонидан амалга оширилади.
Давлат буюртмаси доирасида маҳсулотларни қайта ишлаш учун харид қилиш фермер ва деҳқон хўжаликлари ҳамда «Ўзбекозиқовқатхолдинг» таркибига кирадиган хусусий мулк шаклидаги қайта ишлаш корхоналари ўртасида тузиладиган контрактация шартномалари асосида шартнома қийматининг 40 фоизидан кам бўлмаган миқдорда бўнак бериш орқали амалга оширилади. Ҳўл мева-сабзавот, картошка, полиз маҳсулотлари ва узум фермер ва деҳқон хўжаликларидан келишилган, бозор нархларида харид қилинади.
Янги ва қайта ишланган маҳсулотлар «Ўзагроэкспорт» ихтисослаштирилган ташқи савдо компанияси томонидан хорижий шериклар билан тўғридан-тўғри тузилган экспорт шартномалари, шунингдек, фермер ва деҳқон хўжаликлари, агрофирмалар ва қайта ишлаш корхоналари ўртасида тузиладиган комиссия шартномалари асосида экспорт қилинади.
Июнь ойида Тошкентда 2016 йилги ҳўл мева ва қайта ишланган мева-сабзавот маҳсулотларини экспорт қилиш бўйича шартномалар тузиш учун Халқаро мева-сабзавот маҳсулотлари ярмаркаси ўтказилиши кўзда тутилган. Бундай ярмаркаларни ўтказиш бўйича доимий фаолият кўрсатадиган майдон ташкил этилиб, унинг базасида ҳар йили октябрда келгуси йил учун экспорт шартномалари тузишни ташкил қилиш мақсадида хорижий компанияларнинг фаол иштирокида халқаро ярмаркалар ўтказилади.
Президент қарори билан мева-сабзавот, картошка, полиз маҳсулотлари ва узумни қайта ишлайдиган хусусий мулк шаклидаги корхоналар, идоравий мансублигидан қатъи назар, 2019 йилнинг 1 январигача замонавий ускуна ва технологиялар олиб киришда божхона тўловларидан (божхона йиғимларидан ташқари) озод этилди. Худди шу санагача «Ўзбекозиқовқатхолдинг» таркибига кирадиган қайта ишлаш корхоналари даромад солиғи, юридик шахслар мулк солиғи, микрофирма ва кичик корхоналар учун ягона солиқ, давлат мақсадли фондларига мажбурий ажратмалар (ягона ижтимоий тўловдан ташқари) тўлашдан озод этилди.
Изоҳ (0)