Европа марказий банки (ЕМБ) экспертлар гуруҳига 500 евроли купюраларни муомаладан чиқариш эҳтимоли билан боғлиқ хатарларни ўрганишни топширди. Бу ҳақда банк матбуот хизмати вакили маълум қилган, дея хабар беради «ТАСС».
«Ҳозирда экспертлар бу нимага олиб келиши мумкинлигини текширмоқда. Якунда ўрганиш натижалари бошқарувчилар кенгашига тақдим этилади, бироқ ҳали жараён охирига етмаган», — дея таъкидлаган вакил ЕМБ раҳбари Марио Драгининг Европарламент иқтисодий ва молиявий масалалар қўмитасидаги чиқиши чоғида «500 евро қийматидаги купюралар нолегал фаолият учун тобора кўпроқ восита бўлиб қолмоқда», деганини эслатиб ўтди.
Frankfurter Allgemeine Zeitung нашри ҳисоб-китобларига кўра, мазкур купюраларни муомаладан чиқариш харажатлари тахминан 500 миллион еврога боради. Айни пайтда шундай қийматдаги банкнотлардан 600 миллионга яқини муомалада юрибди.
Изоҳ (0)