Саудия Арабистони қироли Салмон бин Абдулазиз Анқарага келиши муносабати билан унинг маъмурияти Туркия пойтахтидаги ҳашаматли меҳмонхонани тўлиқ банд қилди ва 500 та қимматбаҳо автомобилни ижарага олди. Бу ҳақда Haber Turk телеканали манбаларига таяниб, «ТАСС» хабар бермоқда.
Анқарадаги президент қароргоҳи ва ҳукмрон партия офиси яқинидаги янги беш юлдузли меҳмонхона бир неча кун мобайнида фақат қирол ва унинг мулозимларига хизмат кўрсатади. Меҳмонхонадаги бир неча юз хонанинг барчаси сотиб олинган ва кириш-чиқишнинг алоҳида тартиби ўрнатилган. Қирол алоҳида қаватда истиқомат қилади ва унга фақат ўзининг мулозимлари хизмат кўрсатади. Саудиядан Туркияга бир неча юк машинасида озиқ-овқат, чойшаб ва ёстиқ жилдлар, ҳатто гигиена буюмлари ҳам келтирилган.
Шаҳар бўйлаб ҳаракатланиш ва учрашувлар учун қирол маъмурияти Саудиядан келтирилган транспортдан ташқари Туркияда 500 та «люкс» тоифасидаги машиналарни ҳам ижарага олди. Анқарада шунча ҳашаматли автомобиль ва микроавтобус топилмагани сабабли машиналарнинг бир қисми Истанбул, Анталия ва бошқа катта шаҳарлардан ҳам олиб келинди. Уларнинг барчаси меҳмонхонанинг ерости автотураргоҳига сиғмагани учун отель атрофида қора рангдаги машиналарнинг икки қаторда 200 метрга чўзилган колоннаси пайдо бўлди.
Изоҳ (0)