Facebook’даги «Потребитель.уз» гуруҳи фойдаланувчиларидан бирининг маълум қилишича, Тошкентнинг Бодомзор даҳасида жойлашган «Ал-Delfiн» кафеси ходимлари ҳар тунда катта қора қоплардаги чиқиндиларни яқин орадаги бекат ёнида қолдиради.
«Бу ҳолатни ҳаддан ташқари пасткашлик ва бекатда транспорт кутаётганларга нисбатан ҳурматсизлик белгиси, деб ҳисоблайдиганлар орасида мен ёлғиз эмасдирман?», — деб ёзади кафе ёнидаги чиқиндиларни олиб кетаётган чиқинди ташувчи машина суратларини эълон қилган фойдаланувчи.
Муҳокама жараёнида бир гуруҳ фойдаланувчилар бу суратларга қараб, чиқиндиларни айнан кафе ходимлари олиб чиқиб қўйганини исботлаб бўлмаслигини ва ҳолат учун айнан кафени айблаш ноўрин эканлиги ҳақида фикр билдирган.
Хусусан, фойдаланувчилардан бири эрталаб муҳокамага сабаб бўлган жойдан ўтгани ва у ерда ҳеч қандай чиқинди йўқлигини ёзган. Бунга жавобан суратлар муаллифи чиқиндилар ҳар куни кечаси 24:00—1:00 оралиғида олиб чиқилиши ва ҳар тонг, соат 7:00 гача «Махсустранс» машинасида олиб кетилишини билдирган.
Фойдаланувчиларнинг бошқа бир гуруҳи ҳар қандай ҳолатда ҳам жамоат жойига чиқинди ташлаш номақбул ҳаракат эканлигини, иссиқ кунлар келиши билан бу чиқиндиларнинг ҳидига чидаб бўлмаслигини таъкидлаб, ҳолат юзасидан Ягона портал орқали шикоят қилишни тавсия қилган.
Изоҳ (0)