Саудия Арабистонининг Жидда шаҳрида Ўзбекистоннинг инвестицион салоҳиятига бағишланган тақдимот бўлиб ўтди. Тадбир Ўзбекистоннинг ушбу шаҳардаги бош консуллиги томонидан ташкил этилди, дея хабар беради «Жаҳон».
Тақдимотда Саудиянинг SIRB: The Angel Investor Network, BaseTech: shaping technology for business innovation, Saudi Aramco ва Petro Rabigh каби йирик компаниялари, шунингдек, мамлакат ишбилармон доиралари ва ОАВ вакиллари иштирок этди. Уларнинг эътибори 2015 йили Ўзбекистон иқтисодиётига 15,8 миллиард доллар инвестиция киритилгани, охирги 6 йил ичида эса иқтисодиётга жами 82,8 миллиард доллар жалб этилгани ва уларнинг 21 фоиздан зиёди хориж инвестициялари эканлигига қаратилди.
Тадбир қатнашчиларида айниқса «Навоий» эркин индустриал-иқтисодий ҳудуди, «Ангрен» ва «Жиззах» эркин индустриал ҳудудлари, уларда чет эллик инвесторларга яратилаётган шароит ва берилаётган имтиёзлар ҳақидаги маълумотлар катта қизиқиш уйғотди.