Тоғли Қорабоғда Озарбайжон қўшинлари билан жангларда арманлар томонидан бўлган йўқотишлар 20 нафар қурбон ва 72 нафар ярадорни ташкил этди. Бундай маълумотлар тан олинмаган Тоғли Қорабоғ Республикаси армияси матбуот анжуманида келтириб ўтилди, деб ёзади Meduza. Унда айтилишича, арманларнинг еттита танки отиб шикастланган.
Тан олинмаган Тоғли Қорабоғ Республикаси армияси Озарбайжон кўрган талафотни 300 нафар қурбонга баҳолади. Арманистонликлар, шунингдек, Озарбайжоннинг 18 та танки, учта жанговар пиёдалар машинаси, иккита вертолёти, олтита учувчисиз учар қурилмаси, «Град» бараварига отиш тизими ва битта муҳандислик техникаси йўқ қилинганини таъкидламоқда.
Озарбайжон эса, ўз навбатида, сўнгги соатлар ичида арманларнинг 170 нафаргача ҳарбий хизматчиси ва 12 дона зирҳли техникаси зарарсизлантирилганини айтмоқда. Ўз талафотини Озарбайжон ҳамон 12 қурбонга баҳоламоқда.
Тоғли Қорабоғда 3 апрелдан буён фаол жанговар ҳаракатлар давом этмоқда. Можаронинг иккала томони ҳам бир-бирини вазиятни кескинлаштиришда ва турар-жой туманларини ўққа тутишда айбламоқда.
Изоҳ (0)