Украина президенти Пётр Порошенконинг АҚШга ташрифи чоғида Американинг таниқли The New York Times газетаси ўз таҳририй мақоласида унинг сиёсатини танқид қилиб чиқди, деб ёзади «Корреспондент.net».
Хусусан, мақолада Порошенко сиёсий манёвр имкониятини сақлаб қолиш учун мамлакатда коррупция амалиёти давом эттирилишига имконият яратаётгани ҳақида ёзилади.
«Мистер Порошенко мавжуд коррупцияни ўзи манёвр имконияти учун тўлайдиган нарх деб қабул қилган, шекилли. Аммо президент ва бош вазир шуни тушуниши керакки, ҳукумат украиналиклар ўз норозилик намойишларида талаб қилган демократик тизимни шакллантиришни бошламаса, Халқаро валюта фонди ва донорлар, шу жумладан, АҚШ ҳам коррупция ботқоғини молиялаштиришда давом этмайди», — дея қайд этди нашр.
АҚШга ташрифи давомида ташкил этилган матбуот анжуманида Порошенко ушбу мақолани изоҳлади ва бу мақоладан хабардор эканлигини таъкидлади.
«Аниқ-равшан изоҳлашни истардим: бугунги кунда Украинага қарши гибрид уруш олиб борилмоқда, у, жумладан, Украина давлатини обрўсизлантирувчи ахборотни тарқатиш механизми орқали бўлмоқда», — деди президент.
Изоҳ (0)